Igogailua film laburra

Orona Fundazioan arteak eta kulturak gizartean hausnarketa eragiteko duten botere eraldatzailean sinesten dugu. Horregatik babestu dugu Igogailua film laburra. Josu Martinezek zuzendutako komedia honek, gaur egungo gizartean pertsonen eta teknologiaren artean dagoen harreman konplexua umorez eta sentiberatasunez lantzen du.

Egoera unibertsal batetik abiatzen da istorioa: denok, uneren batean, ikusezin sentitu gara. Zerbitzariak barran ikusten ez gaituenean, autobusa gelditu gabe igarotzen denean edo esaten duguna inork entzuten ez duela ohartzen garenean. Igogailua-n, sentimendu horrek forma komiko eta surrealista hartzen du: besteekiko komunikazio faltagatik etsita, bere psikiatraren bulegoko igogailuarekin hizketan bakarrik kontsolamendua aurkitzen duen gizonarena.

Inkomunikazioari, bakardadeari eta teknologiak bizitza modernoan duen paperari buruzko hausnarketa planteatzen du film laburrak. Zientziak eta adimen artifizialak edozertarako irtenbideak eskaintzen dituztela dirudien mundu honetan, teknologiak benetan gaitz gizatiarrenak senda ditzakeen galdetzera gonbidatzen du filmak: konexio falta, enpatia eta entzutea.

Laguntza horrekin, Orona Fundazioak tokiko sortzaileekiko duen konpromisoa eta ikus-entzunezko talentuaren sustapena indartzen ditu, batez ere sormen artistikoa eta egungo erronka sozialekiko begirada kritikoa konbinatzen dituzten proiektuetan.